Manna Matrimony.Com
Thalikettu.Com
വിദ്വേഷ പ്രസംഗത്തില് മുന് എംഎല്എയും ജനപക്ഷം നേതാവുമായ പിസി ജോര്ജ്ജിന്റെ മുന്കൂര് ജാമ്യാപേക്ഷ എറണാകുളം ജില്ലാ സെഷന്സ് കോടതി മാറ്റി. ജാമ്യപേക്ഷ കോടതി ബുധനാഴ്ച്ച പരിഗണിക്കും. കേസ് ഡയറി പ്രോസിക്യഷന് കോടതിയില് സമര്പ്പിച്ചു.
എറണാകുളം വെണ്ണലയിലെ ക്ഷേത്രത്തില് നടത്തിയ പ്രസംഗവുമായി ബന്ധപ്പെട്ടാണ് ജാമ്യമില്ലാക്കുറ്റം ചുമത്തി കേസെടുത്തത്. സര്ക്കാര് നടപടി രാഷ്ടീയ ലക്ഷ്യങ്ങളോടെയാണെന്നും ജാമ്യം വേണമെന്നുമാണ് പി സി ജോര്ജിന്റെ ആവശ്യം. കേസില് തന്റെ അറസ്റ്റ് തടഞ്ഞ് ഇടക്കാല ഉത്തരവ് വേണമെന്ന പി സി ജോര്ജിന്റെ ആവശ്യം കോടതി തള്ളിയിരുന്നു.
വെണ്ണലയിലെ പരിപാടിയിലേക്ക് പിസി ജോര്ജ്ജിനെ വിളിച്ചതിലെ ഗൂഢാലോചന അന്വേഷിക്കുമെന്ന് കൊച്ചി സിറ്റി പൊലീസ് കമ്മീഷണര് സി എച്ച് നാഗരാജു പറഞ്ഞിരുന്നു. വിദ്വേഷ പ്രസംഗം ആവര്ത്തിക്കാനുള്ള സാധ്യതയുണ്ടെന്ന് അറിഞ്ഞിട്ടാണോ സംഘാടകര് ക്ഷണിച്ചതെന്ന് അന്വേഷിക്കുമെന്നും, പിസി ജോര്ജ്ജിനെ അറസ്റ്റ് ചെയ്യുന്നതില് പൊലീസിന് തിടുക്കമില്ലെന്നും കമ്മീഷണര് പറഞ്ഞിരുന്നു.
ഉപതെരഞ്ഞെടുപ്പ് നടക്കുന്ന തൃക്കാക്കര മണ്ഡലത്തിലെ വെണ്ണല മഹാദേവ ക്ഷേത്രത്തില് സപ്താഹ യജ്ഞത്തിന്റെ സമാപനപരിപാടിയില് നടത്തിയ പ്രസംഗത്തിന്റെ പേരിലാണ് പി സി ജോര്ജ്ജിനെതിരെ കേസ്. പാലാരിവട്ടം പൊലീസാണ് പി സി ജോര്ജ്ജിന് എതിരെ സ്വമേധയാ കേസെടുത്തത്. 135 എ, 295 വകുപ്പുകള് പ്രകാരമാണ് കേസ്. തിരുവനന്തപുരത്ത് രജിസ്റ്റര് ചെയ്ത സമാനമായ കേസില് നടപടികള് നേരിടവെയാണ് പിസി ജോര്ജ് എറണാകുളം വെണ്ണലയിലും വിദ്വേഷ പ്രസംഗം നടത്തിയത്.
അനന്തപുരി ഹിന്ദു മഹാസമ്മേളനത്തില് വിദ്വേഷ പ്രസംഗം നടത്തിയെന്ന കേസില് അറസ്റ്റിലായ പിസി ജോര്ജിന് ഉപാധികളോടെയാണ് ജാമ്യം അനുവദിച്ചത്. വിദ്വേഷ പ്രസംഗം പാടില്ല, സാക്ഷികളെ സ്വാധീനിക്കാന് ശ്രമിക്കരുത് എന്നീ വ്യവസ്ഥകളോടെയാണ് ജുഡീഷ്യല് ഫസ്റ്റ് ക്ലാസ് കോടതി ജാമ്യം അനുവദിച്ചത്. എന്നാല് ജാമ്യം ലഭിച്ചതിന് പിന്നാലെ തന്റെ പ്രസ്താവനയില് ഉറച്ചു നില്ക്കുന്നെന്നാണ് മാധ്യമങ്ങളോട് പിസി ജോര്ജ് പറഞ്ഞത്.
