Manna Matrimony.Com
Thalikettu.Com
സിപിഐഎം പാര്ട്ടി കോണ്ഗ്രസ് സെമിനാറില് പങ്കെടുക്കാന് കെ വി തോമസിനെ ക്ഷണിച്ചത് കോണ്ഗ്രസ് പ്രതിനിധിയെന്ന നിലയിലെന്ന ജനറല് സെക്രട്ടറി സീതാറാം യെച്ചൂരി. പാര്ട്ടി പുറത്താക്കിയാല് സംരക്ഷിക്കുമോയെന്ന ചോദ്യത്തിന് ഇപ്പോള് പ്രസക്തിയില്ല. മതേതര ഐക്യത്തില് സഹകരിക്കണമോയെന്ന് തീരുമാനിക്കേണ്ടത് കോണ്ഗ്രസാണ്. ഇന്ത്യയെ സംരക്ഷിക്കണമെന്നുള്ളവര് ഒന്നിച്ച് നില്ക്കണമെന്ന് അദ്ദേഹം പറഞ്ഞു.
ഇതിനിടെ സ്റ്റാലിനെ പ്രശംസിച്ചു എന്ന വാര്ത്തകള് ശരിയല്ലെന്നും യെച്ചൂരി വ്യക്തമാക്കി. ഏറ്റവും മികച്ച ബിജെപി ഇതര മുഖ്യമന്ത്രി സ്റ്റാലിന് ആണെന്ന് പറഞ്ഞിട്ടില്ല. ബിജെപി ഇതര മുഖ്യമന്ത്രിമാര് ഒന്നിച്ചു വരണം എന്നാണ് പറഞ്ഞതെന്ന് അദ്ദേഹം വ്യക്തമാക്കി.
കണ്ണൂരില് നടക്കുന്ന സിപിഐഎം പാര്ട്ടി കോണ്ഗ്രസ് സെമിനാറില് മുതിര്ന്ന കോണ്ഗ്രസ് നേതാവ് കെ വി തോമസ് ഇന്ന് പങ്കെടുക്കും. വൈകിട്ട് അഞ്ചിന് മുഖ്യമന്ത്രി പിണറായി വിജയനും തമിഴ്നാട് മുഖ്യമന്ത്രി എം കെ സ്റ്റാലിനുമൊപ്പമാണ് കെ വി തോമസ് വേദി പങ്കിടുക. ‘കേന്ദ്രവും സംസ്ഥാനങ്ങളും തമ്മിലുള്ള ബന്ധം’ എന്ന വിഷയത്തിലാണ് സിപിഐഎം പാര്ട്ടി കോണ്ഗ്രസ് സെമിനാര്.
ഇന്നലെ കെ വി തോമസിന് കണ്ണൂര് വിമാനത്താവളത്തില് സിപിഐഎം വന് സ്വീകരണമാണ് ഒരുക്കിയിരുന്നത്. കണ്ണൂര് ജില്ലാ സെക്രട്ടറി എം വി ജയരാജനും പാര്ട്ടി പ്രവര്ത്തകരും കെ വി തോമസിനെ സ്വീകരിക്കാന് വിമാനത്താവളത്തിലെത്തിയിരുന്നു.
അതേസമയം തനിക്ക് പറയാനുള്ളതെല്ലാം പാര്ട്ടി സമ്മേളനത്തിന്റെ ഭാഗമായ സെമിനാറില് താന് പറയുമെന്ന് കെ വി തോമസ് ഇതിനോടകം വ്യക്തമാക്കിയിട്ടുണ്ട്.
