Manna Matrimony.Com
Thalikettu.Com
സാംസ്ഥാനത്ത് നിരക്ക് വര്ധനവ് ആവശ്യപ്പെട്ട് ബസുടമകള് നടത്തുന്ന സ്വകാര്യ ബസ് സമരം പിന്വലിച്ചു. ബസുടമകള് മുഖ്യമന്ത്രിയുമായി നടത്തിയ ചര്ച്ചയിലാണ് സമരം പിന്വലിക്കാന് തീരുമാനമായത്.
നിരക്ക് വര്ധന അടക്കമുള്ള ആവശ്യങ്ങളുന്നയിച്ചാണ് ബസ് ഉടമകള് സമരം ആരംഭിച്ചത്. മിനിമം ചാര്ജ് 12 രൂപയാക്കണം എന്ന ആവശ്യമാണ് ബസുടമകള് മുന്നോട്ടുവെച്ചത്. എസ്എസ്എല്സി, പ്ലസ്ടു പരീക്ഷകള് ആരംഭിക്കാനിരിക്കെയാണ് മുഖ്യമന്ത്രി തന്നെ നേരിട്ട് ഇടപെട്ട് ചര്ച്ച നടത്തിയത്. ബസ് സമരത്തെ തുടര്ന്ന് മലബാര് മേഖലയിലടക്കം വലിയ യാത്രാക്ലേശം ഉണ്ടായിരുന്നു.
മുഖ്യമന്ത്രി ആവശ്യപ്പെട്ടതിനെ തുടര്ന്നാണ് സമരം പിന്വലിച്ചതെന്നും സ്വകാര്യ ബസുടമകള് അറിയിച്ചു. ആവശ്യങ്ങള് അനുഭാവപൂര്വ്വം പരിഗണിക്കാമെന്ന് മുഖ്യമന്ത്രി ഉറപ്പ് നല്കി. വിദ്യാര്ത്ഥികളുടെ നിരക്ക് വര്ധനയാണ് പ്രധാനമായും ഉന്നയിച്ചതെന്നും അവര് വ്യക്തമാക്കി. വാഹന നികുതി ഒഴിവാക്കണമെന്നും ആവശ്യപ്പെട്ടുണ്ട്. ഈ മാസം 30 ന് ചേരുന്ന എല്ഡിഎഫ് യോഗത്തിന് ശേഷം വര്ധന ഉണ്ടാകുമെന്ന് മുഖ്യമന്ത്രി ഉറപ്പ് നല്കിയെന്നും ബസുടമകള് കൂട്ടിച്ചേര്ത്തു.
ബസ് നിരക്ക് കൂട്ടിയെന്ന പ്രഖ്യാപനം നടപ്പാക്കാതെ സമരം പിന്വലിക്കില്ലെന്ന നിലപാടിലായിരുന്നു ബസ് ഉടമകള്. 30ന് എല്ഡിഎഫ് യോഗം ചേര്ന്ന് നിരക്കു വര്ധനയില് അന്തിമ തീരുമാനമെടുക്കാമെന്ന് സര്ക്കാര് പറഞ്ഞിരുന്നെങ്കിലും ബസ് ഉടമകള് സമരം പിന്വലിക്കാന് തയ്യാറായിരുന്നില്ല.
