Manna Matrimony.Com
Thalikettu.Com
അന്വേഷണ ഉദ്യോഗസ്ഥര്ക്കെതിരായ ഗൂഢാലോചനാക്കേസില് രണ്ടാം ദിവസത്തെ ചോദ്യം ചെയ്യലിനായി ദിലീപ് കളമശ്ശേരി ക്രൈംബ്രാഞ്ച് ഓഫീസില് എത്തി. ദിലീപിനൊപ്പം സഹോദരന് അനൂപും സഹോദരി ഭര്ത്താവ് സൂരജും ഉണ്ട്. രാവിലെ 9 മുതല് രാത്രി എട്ട് വരെയാണ് ചോദ്യം ചെയ്യാന് അനുമതിയുള്ളത്.
അന്വേഷണ ഉദ്യോഗസ്ഥര് അഞ്ച് സംഘങ്ങളായി തിരിഞ്ഞായിരുന്നു ഇന്നലെ പ്രതികളെ ചോദ്യം ചെയ്തത്. ഇന്നലെ രേഖപ്പെടുത്തിയ മൊഴികളുടെ പരിശോധന പൂര്ത്തിയായി. ഒരുമിച്ച് ചോദ്യം ചെയ്യേണ്ടവരുടെ പട്ടികയും അന്വേഷണസംഘം തയാറാക്കിയിട്ടുണ്ട്. മൊഴികളിലെ വൈരുദ്ധ്യത്തില് വ്യക്തത വരുത്താനാണ് ഒന്നിച്ചിരുത്തി ചോദ്യം ചെയ്യുന്നത്. അന്വേഷണ ഉദ്യോഗസ്ഥരെ വധിക്കാന് വാക്കാല് ഗൂഢാലോചന നടത്തിയതിന് പുറമേ ആസൂത്രണം ചെയ്ത് നടപ്പിലാക്കാന് ശ്രമിച്ചതിന്റെയും തെളിവുകള് അന്വേഷണസംഘത്തിന് ലഭിച്ചിരുന്നു.
ദിലീപിന്റെ സഹോദരി ഭര്ത്താവ് സൂരജ്, ബന്ധു അപ്പു സുഹൃത്ത് ബൈജു എന്നിവരുടെ മൊബൈല് ഫോണുകള് ഇന്നലെ അന്വേഷണസംഘം കസ്റ്റഡിയിലെടത്തിരുന്നു. പതിമൂന്നാം തിയതി നടന്ന റെയ്ഡില് കസ്റ്റഡിയിലെടുത്ത ദിലീപിന്റെയും അനൂപിന്റെയും മൊബൈല് ഫോണുകള് അന്വേഷണസംഘം വിട്ടുനല്കിയില്ല.
അതേസമയം അഞ്ച് ഫോണുകളും ഇന്ന് ശാസ്ത്രീയ പരിശോധനക്ക് വിധേയമാക്കും. നാളെയും പ്രതികളെ ചോദ്യം ചെയ്യാന് അന്വേഷണസംഘത്തിന് കോടതി അനുമതി നല്കിയിട്ടുണ്ട്.
