തിരുവനന്തപുരത്ത് കരീബിയൻ വെടിക്കെട്ട്; ഇന്ത്യയെ എട്ട് വിക്കറ്റിന് തകർത്ത് വിൻഡീസ്

രണ്ടാം ടി20യിൽ ഇന്ത്യയെ എട്ട് വിക്കറ്റിന് തകർത്ത് വെസ്റ്റ് ഇൻഡീസ്. ഇതോടെ പരമ്പര 1-1ന് സമനിലയിലായി. 45 പന്തിൽ നിന്ന് 67 റൺസെടുത്ത് പുറത്താവാതെ നിന്ന സിമൻസാണ് വിൻഡീസ് വിജയത്തിൽ നിർണായക പങ്ക് വഹിച്ചത്. നിക്കോളാസ് പൂരൻ 18 പന്തിൽ നിന്ന് 38 റൺസുമായി പുറത്താവാതെ നിന്നു.

സിമ്മൻസും എവിൻ ലെവിസും തുടക്കം മുതൽ തന്നെ ഇന്ത്യൻ ബോളർമാർക്ക് മുകളിൽ ആധിപത്യം സ്ഥാപിച്ചാണ് കളിച്ചത്. പത്താം ഓവറിലാണ് ഇന്ത്യക്ക് വിൻഡീസിൻെറ ആദ്യ വിക്കറ്റ് വീഴ്ത്താനായത്. 35 പന്തിൽ നിന്ന് 40 റൺസെടുത്താണ് ലെവിസ് പുറത്തായത്. ഹെറ്റ് മെയർ 23 റൺസെടുത്തും മടങ്ങി.

ശിവം ദുബെക്ക് അർധശതകം, ഇന്ത്യക്ക് മികച്ച സ്കോർ

തിരുവനന്തപുരം ടി20യിൽ ആദ്യം ബാറ്റ് ചെയ്ത ഇന്ത്യ 7 വിക്കറ്റ് നഷ്ടത്തിൽ 170 റൺസെടുത്തു. ശിവം ദുബെ ഇന്ത്യക്കായി അ‍ർധശതകം നേടി. 22 പന്തിൽ നിന്ന് 33 റൺസെടുത്ത് റിഷഭ് പന്ത് പുറത്താവാതെ നിന്നു. വെസ്റ്റ് ഇൻഡീസിനായി കെസ്റിക്ക് വില്യംസും ഹെയ്ഡൻ വാൽഷും 2 വീതം വിക്കറ്റുകൾ വീഴ്ത്തി.

ടോസ് നഷ്ടപ്പെട്ട് ആദ്യം ബാറ്റിങിന് ഇറങ്ങിയ ഇന്ത്യക്ക് ഭേദപ്പെട്ട തുടക്കമാണ് ലഭിച്ചത്. ഒന്നാം ടി20യിൽ അർധശതകം നേടിയ ഓപ്പണർ കെഎൽ രാഹുൽ പെട്ടെന്ന് പുറത്തായി. 11 റൺസെടുത്താണ് രാഹുൽ പുറത്തായത്. അധികം വൈകാതെ 15 റൺസെടുത്ത രോഹിത് ശർമയും പുറത്തായി. മൂന്നാമനായി സ്ഥാനക്കയറ്റം കിട്ടിയ ശിവം ദുബെയാണ് ഇന്ത്യയുടെ സ്കോർ ഉയർത്തിയത്. ടി20യിൽ തൻെറ ആദ്യ അർധശതകം നേടിയ ദുബെ 30 പന്തിൽ നിന്ന് 54 റൺസെടുത്തു.

സഞ്ജുവിനെ കളിപ്പിച്ചില്ല

തിരുവനന്തപുരത്ത് ഇന്ത്യയും വെസ്റ്റ് ഇൻഡീസും തമ്മിലുള്ള രണ്ടാം ടി20 മത്സരം. ടോസ് നേടിയ വെസ്റ്റ് ഇൻഡീസ് ആദ്യം ഫീൽഡ് ചെയ്യാൻ തീരുമാനിച്ചു. ഹൈദരാബാദിൽ കളിച്ച അതേ ടീമിനെ ഇന്ത്യ നിലനിർത്തിയിരിക്കുകയാണ്. മലയാളി ക്രിക്കറ്റർ സഞ്ജു സാംസൺ ടീമിലില്ല.

രണ്ടാം ടി20യിൽ വെസ്റ്റ് ഇൻഡീസിനെ പരാജയപ്പെടുത്തി പരമ്പര വിജയം ഉറപ്പാക്കാൻ ടീം ഇന്ത്യ. ഹൈദരാബാദിൽ 6 വിക്കറ്റിനാണ് ഇന്ത്യ വിൻഡീസിനെ തോൽപ്പിച്ചത്. ബാറ്റിങ് നിര ഫോമിലാണെന്നതാണ് ഇരുടീമുകളുടെയും അനുകൂല ഘടകം. നിലവിലെ ടി20 ലോക ചാമ്പ്യൻമാരായ വെസ്റ്റ് ഇൻഡീസ് ഏത് സാഹചര്യത്തിലും തിരിച്ച് വരാൻ പറ്റുന്ന ടീമാണ്.