ഇത്തവണത്തെ സംസ്ഥാന ചലച്ചിത്ര പുരസ്‌കാരം കരസ്ഥമാക്കിയവരിൽ മാങ്ങാനം സ്വദേശിയും ; മാങ്ങാനം ചെമ്മരപ്പള്ളി സ്വദേശി ആദർശ് ജോസഫ് ചെറിയാനാണ് അവാർഡിന് അർഹനായത്

കോട്ടയം: 2021 ലെ സംസ്ഥാന ചലച്ചിത്ര അവാർഡ് കരസ്ഥമാക്കിയവരിൽ മാങ്ങാനം സ്വദേശിയും. മാങ്ങാനം ചെമ്മരപ്പള്ളി പാലമറ്റം വീട്ടിൽ ആദർശ് ജോസഫ് ചെറിയാനാണ് മികച്ച ശബ്ദ സമന്യയ (Sync Sound) ത്തിനുള്ള 2021 ലെ അവാർഡിന് അർഹനായത്.

2020 ഇൽ പുറത്തിറങ്ങിയ സന്തോഷത്തിന്റെ ഒന്നാം രഹസ്യം എന്ന ചിത്രത്തിനാണ് മികച്ച ശബ്ദ സമന്യയത്തിനുള്ള അവാർഡ് ലഭിച്ചത്. 85 മിനുട്ട് ദൈർഘ്യമുള്ള ഈ ചിത്രം സംവിധാനം ചെയ്തത് ഡോൺ പാലത്തറയാണ്. നിർമാണം ഷിജോ കെ ജോർജ്. ഈ ചിത്രത്തിൽ ശബ്ദ സമന്യയം (Sync Sound) നിർവഹിച്ചത് ആദർശ് ആയിരുന്നു.

85 മിനിറ്റ് ദൈർഘ്യമുള്ള ഈ സിനിമ മുഴുവൻ ഒറ്റ ഫ്രെയിമിലും ഒറ്റ ഷോട്ടിലുമാണ് ചിത്രീകരിച്ചത്. റിമ കല്ലിങ്കലും, ജിതിൻ പുത്തഞ്ചേരിയുമൊത്തുള്ള ഒരു കാർ യാത്രയും, അവരുടെ അനുഭവത്തെയും പിൻപറ്റുന്നതാണ് ചിത്രത്തിന്റെ പ്രമേയം. 2021 ജൂലൈയിൽ നീസ്ട്രീമിലും മറ്റ് ആറ് ഒടിടി പ്ലാറ്റ്ഫോമുകളിലുമായി ചിത്രം പുറത്തിറങ്ങി.

നിനച്ചിരിക്കാതെയാണ് അവാർഡിന്റെ മധുരം ആദർശിന്റെ തേടിയെത്തിയത്. കഴിഞ്ഞ 8 വർഷമായി ചലച്ചിത്ര ശബ്ദ സാങ്കേതിക മേഖലകളിൽ ജോലി ചെയ്തു വരികയായിരുന്നു ആദർശ്. പുതുപ്പള്ളി ഡോൺ ബോസ്‌കോ സ്‌കൂളിൽ നിന്ന് പ്രാഥമിക വിദ്യാഭ്യാസം പൂർത്തിയാക്കിയ ആദർശ്, കോട്ടയം എം ടി സെമിനാരി സ്‌കൂളിൽ നിന്ന് ഹയർസെക്കണ്ടറി വിദ്യാഭ്യാസം പൂർത്തിയാക്കിയശേഷം സൗണ്ട് എഡിറ്റിങ് മേഖലയിലേക്ക് തിരിയുകയായിരുന്നു.

മാങ്ങാനം ചെമ്മരപ്പള്ളി പാലമറ്റം വീട്ടിൽ ചെറിയാൻ പി ഉമ്മനാണ് ആദർശിന്റെ പിതാവ്. മാതാവ് അന്നമ്മ ചെറിയാൻ. ഇൻഫോ പാർക്കിൽ ഉദ്യോഗസ്ഥയായ സൗമ്യ മേരി തോമസാണ് ആദർശിന്റെ ഭാര്യ. സൈറ ആൻ ജോസഫ് മകളാണ്.