Manna Matrimony.Com
Thalikettu.Com
കേരളത്തില് അഗ്നിപഥ് റിക്രൂട്ട്മെന്റ് റാലി നവംബര് 15ന് ആരംഭിച്ച് 30ന് സമാപിക്കും. ഏഴു തെക്കന് ജില്ലകളിലെ പുരുഷ ഉദ്യോഗാര്ത്ഥികള്ക്കായാണ് ബാംഗ്ലൂര് റിക്രൂട്ടിംഗ് സോണിന്റെ നേതൃത്വത്തില് റാലി നടത്തുന്നത്. തിരുവനന്തപുരത്തെ ആര്മി റിക്രൂട്ടിംഗ് ഓഫീസ്, കൊല്ലത്തെ ലാല് ബഹദൂര് ശാസ്ത്രി സ്റ്റേഡിയം എന്നിവിടങ്ങളിലായിരിക്കും റാലി.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലക്കാര്ക്ക് പങ്കെടുക്കാം. താല്പര്യമുള്ളവര് ആഗസ്റ്റ് 01 മുതല് 30 വരെ www.joinindianarmy.nic.in എന്ന വെബ്സൈറ്റില് ഓണ്ലൈനായി രജിസ്റ്റര് ചെയ്യണം.
അഗ്നിവീര് ജനറല് ഡ്യൂട്ടി, അഗ്നിവീര് ടെക്നിക്കല്, അഗ്നിവീര് ട്രേഡ്സ്മെന് (പത്താംതരം പാസ്), അഗ്നിവീര് (എട്ടാം ക്ലാസ്), അഗ്നിവീര് ക്ലര്ക്ക്/ സ്റ്റോര് കീപ്പര് ടെക്നിക്കല് എന്നീ വിഭാഗങ്ങള് സേനയില് എന്റോള് ചെയ്യുന്നതിനാണ് റാലി സംഘടിപ്പിക്കുന്നത്.
ആര്മിയില് നിര്ദ്ദിഷ്ട വിഭാഗങ്ങളില് ചേരുന്നതിനുള്ള പ്രായം, വിദ്യാഭ്യാസ യോഗ്യത, മറ്റ് മാനദണ്ഡങ്ങള് എന്നിവയുടെ വിശദാംശങ്ങള് 2022 ഓഗസ്റ്റ് 1-ന് വെബ്സൈറ്റില് പ്രസിദ്ധീകരിക്കുന്ന വിജ്ഞാപനത്തില് നല്കും. രജിസ്റ്റര് ചെയ്ത ഉദ്യോഗാര്ത്ഥിയുടെ അഡ്മിറ്റ് കാര്ഡുകള് 2022 നവംബര് 01 മുതല് 10 വരെ അവരുടെ ഇമെയിലിലേക്ക് അയയ്ക്കുമെന്ന് അധികൃതര് അറിയിച്ചു.
