Manna Matrimony.Com
Thalikettu.Com
ആയിരങ്ങള് പങ്കെടുത്ത യുഡിഎഫ് പ്രതിഷേധ മാര്ച്ചിന് മറുപടി നല്കാന് ഇന്ന് വൈകിട്ട് മൂന്ന് മണിക്ക് കല്പ്പറ്റയില് സിപിഐഎം ശക്തി പ്രകടനം നടത്തും. സമാധാനപരമായി പ്രതിഷേധിക്കാനാണ് പ്രവര്ത്തകരോട് എല്ഡിഎഫ് ആഹ്വാനം ചെയ്തിരിക്കുന്നത്. ബഹുജനങ്ങളെ അണിനിരത്തി യുഡിഎഫ് ആക്രമണങ്ങളെ ചെറുക്കുമെന്ന് ഇടതു മുന്നണി അറിയിച്ചിട്ടുണ്ട്. ശനിയാഴ്ച യുഡിഎഫ് സംഘടിപ്പിച്ച പ്രതിഷേധ മാര്ച്ചിന് കല്പ്പറ്റ ടൗണില് തന്നെ മറുപടി പറയാനാണ് സിപിഐഎമ്മിന്റെ ശ്രമം.
എസ്എഫ്ഐ വയനാട് ജില്ലാ കമ്മിറ്റി യോഗവും ചൊവ്വാഴ്ച ചേരും. ജില്ലാ കമ്മിറ്റിയുടെ വിശദീകരണം കേട്ട ശേഷം സംസ്ഥാന സെന്റര് യോഗത്തില് നടപടി തീരുമാനിക്കും. രാഹുല് ഗാന്ധിയുടെ ഓഫിസ് ആക്രമിച്ച കേസില് അഞ്ച് എസ്എഫ്ഐ പ്രവര്ത്തകര് കൂടി അറസ്റ്റിലായി. ഇതോടെ കേസില് പിടിയിലായവരുടെ എണ്ണം 30 ആയി. ഇതില് മൂന്ന് വനിതാ പ്രവര്ത്തകരും ഉള്പ്പെടുന്നു. അക്രമ സംഭവത്തില് 19 എസ് എഫ് ഐ പ്രവര്ത്തകരെ റിമാന്ഡ് ചെയ്തു. മാനന്തവാടി ഡി വൈ എസ്പിയുടെ നേതൃത്വത്തില് പ്രത്യേക അന്വേഷണസംഘമാണ് കേസ് അന്വേഷിക്കുന്നത്. പ്രതിഷേധങ്ങളിലെ സംഘര്ഷ സാധ്യത കണക്കിലെടുത്ത് കനത്ത പൊലീസ് സന്നാഹമാണ് ജില്ലയില് ഒരുക്കിയിട്ടുള്ളത്.
എസ്എഫ്ഐ പ്രവര്ത്തകര് രാഹുല് ഗാന്ധിയുടെ ഓഫീസ് ആക്രമിച്ചതിനെതിരെ ഇന്നലെ കല്പ്പറ്റയില് പ്രകടനമായെത്തിയ കോണ്ഗ്രസുകാര് ദേശാഭിമാനി ഓഫീസ് ആക്രമിച്ചിരുന്നു. ഓഫീസിന് നേരെ കല്ലെറിഞ്ഞശേഷം മുദ്രാവാക്യം വിളികളോടെ ഓഫീസിലേക്ക് ഇരച്ചു കയറാനും ശ്രമിച്ചു. ഇന്നലെ വൈകിട്ട് 4.45 ഓടെയായിരുന്നു സംഭവം.
കെഎസ്യു സംസ്ഥാന പ്രസിഡന്റ് കെ എം അഭിജിത്ത്, കല്പ്പറ്റ ബ്ലോക്ക് പഞ്ചായത്ത് മെമ്പര് ജഷീര് പള്ളിവയല് എന്നിവരുടെ നേതൃത്വത്തിലാണ് കല്പ്പറ്റയില് പ്രകടനം നടന്നത്. ദേശീയ പാതയിലെ റാലിക്കിടെ ഒരു സംഘം പ്രവര്ത്തകര് വഴിതിരിഞ്ഞ് കല്പ്പറ്റ പള്ളിത്താഴെ റോഡിലുള്ള ദേശാഭിമാനി ഓഫീസിലേക്ക് എത്തി കല്ലെറിയുകയായിരുന്നു.
