Manna Matrimony.Com
Thalikettu.Com
യുവനടിയെ പീഡിപ്പിച്ച കേസില് നടനും നിര്മാതാവുമായ വിജയ് ബാബു ദുബായില് നിന്നും ഇന്ന് കൊച്ചിയിലെത്തില്ല. നാട്ടിലെത്താന് ബുക്ക് ചെയ്ത ടിക്കറ്റ് വിജയ് ബാബു റദ്ദാക്കി. ദുബായില് നിന്ന് രാവിലെ 9 ന് എത്തുന്ന എമിറേറ്റ്സ് വിമാന ടിക്കറ്റാണ് റദ്ദാക്കിയത്. കേസില് വിജയ് ബാബുവിന്റെ മുന്കൂര് ജാമ്യാപേക്ഷ ഹൈക്കോടതി പരിഗണിക്കാനിരിക്കെയാണ് മടക്ക യാത്ര റദ്ദാക്കിയത്.
നാട്ടിലേക്ക് മടങ്ങാത്ത സാഹചര്യത്തില് ഹൈക്കോടതി എന്ത് തീരുമാനമെടുക്കുമെന്നാണ് അന്വേഷണ സംഘം ഉറ്റുനോക്കുന്നത്. 30ന് നടന് എത്തിയില്ലെങ്കില് മുന്കൂര് ജാമ്യാപേക്ഷ തള്ളുമെന്ന് ഹൈക്കോടതി കഴിഞ്ഞ ദിവസം വ്യക്തമാക്കിയിയിരുന്നു. കേസില് വിജയ് ബാബു നാട്ടിലെത്തിയ ശേഷം തുടര് നടപടികള് സ്വീകരിച്ചാല് പോരെയെന്ന് കോടതി ചോദിക്കുകയും ചെയ്തിരുന്നു.
പ്രോസിക്യൂഷനും പരാതിക്കാരിക്കും ബന്ധപ്പെട്ടവര്ക്കും ഏറ്റവും നല്ലത് കോടതിയുടെ നിയമാധികാര പരിധിയില് പ്രതി വരുന്നതാണെന്ന് ജസ്റ്റിസ് പി ഗോപിനാഥ് വാക്കാല് പറഞ്ഞത്. എന്നാല് ഇന്നും വിജയ് ബാബു തിരിച്ചെത്താത്ത സാഹചര്യത്തില് കോടതി തീരുമാനം നിര്ണായകമാവും.
പരാതിക്കാരിയായ നടിയുമായി താന് സൗഹൃദത്തിലായിരുന്നുവെന്നും പരസ്പര സമ്മത പ്രകാരമാണ് ലൈംഗിക ബന്ധത്തില് ഏര്പ്പെട്ടതെന്നുമാണ് വിജയ് ബാബു കോടതിയെ അറിയിച്ചത്. വാട്സ് ആപ് ചാറ്റുകളുടെ പകര്പ്പുകളും വിജയ് ബാബു കോടതിയില് ഹാജരാക്കിയിട്ടുണ്ട്. താന് നിര്മിക്കുന്ന സിനിമയിലേക്ക് മറ്റൊരു നടിക്ക് അവസരം നല്കിയെന്ന് മനസ്സിലായതോടെയാണ് യുവനടി തനിക്കെതിരെ ആരോപണം ഉന്നയിച്ചതെന്ന് വിജയ് ബാബു ഉപഹര്ജിയില് ആരോപിക്കുന്നുണ്ട്.
കോടതി അറസ്റ്റ് തടഞ്ഞിട്ടില്ലാത്തതിനാല് വിമാനത്താവളത്തില് വെച്ച് തന്നെ ഇയാളെ പിടികൂടാനുള്ള ഒരുക്കത്തിലായിരുന്നു പൊലീസ്. ഈ സാഹചര്യത്തിലാണ് വിജയ് ബാബു ടിക്കറ്റ് റദ്ദാക്കിയതെന്നാണ് പുറത്തു വരുന്ന വിവരം.
