ഇപ്പോള്‍ ഇരുനൂറലധികം ഇടങ്ങളിലാണ് കാട്ടുതീ പടര്‍ന്നുകൊണ്ടിരിക്കുന്നത്. ന്യൂ സൗത്ത് വടക്ക് കിഴക്കന്‍ മേഖലയിലെ വെയില്‍സ്, വിക്റ്റോറിയ സംസ്ഥാനങ്ങളിലാണ് ഏറ്റവുമധികം ഇടങ്ങളില്‍ കാട്ടുതീ പടര്‍ന്നത്. ന്യൂ സൗത്ത് വെയില്‍സില്‍ ഒരാഴ്‍ചത്തെ അടിയന്തിരാവസ്ഥയാണ് പ്രഖ്യാപിച്ചത്. വിനോദസ‌ഞ്ചാര കേന്ദ്രങ്ങളില്‍ നിന്നും ബീച്ചുകളില്‍ നിന്നും ആളുകളെ ഒഴിപ്പിച്ചുകൊണ്ടിരിക്കുകയാണ്. മിക്കയിടങ്ങളിലും റോഡുകള്‍ തടസ്സപ്പെട്ടതിനാല്‍ ഹെലികോപ്റ്ററുകളിലാണ് ആളുകളെ ഒഴിപ്പിക്കുന്നത്.
അടുത്ത ഏഴ് ദിവസത്തേക്കാണ് ന്യൂ സൗത്ത് വെയില്‍സില്‍ അടിയന്തിരാവസ്ഥ പ്രഖ്യാപിച്ചത്. ഈ ദിവസങ്ങളില്‍ താപനില റെക്കോര്‍ഡ് ഉയരത്തിലെത്തുമെന്നാണ് കാലാവസ്ഥാ വിദഗ്‍ധര്‍ നല്‍കുന്ന മുന്നറിയിപ്പ്. ശക്തമായ കാറ്റും ഉണ്ടാകും. ശനിയാഴ്‍ചയ്ക്ക് മുമ്പ് ന്യൂ സൗത്ത് വെയില്‍സ് തീരത്ത് നിന്ന് 260 കിലോമീറ്ററെങ്കിലും അകലേക്ക് മാറണമെന്നാണ് അധികൃതര്‍ നിര്‍ദേശം നല്‍കിയിരിക്കുന്നത്. തീരപ്രദേശമാകെ കാട്ടുതീയാല്‍ ചുറ്റപ്പെട്ടിരിക്കുകയാണ്. ഇവിടങ്ങളില്‍ നിന്ന് നാവികസേന കപ്പലിലാണ് ആളുകളെ നീക്കുന്നത്.
കാട്ടുതീ ഏറ്റവും രൂക്ഷമായ ന്യൂ സൗത്ത് വെയില്‍സില്‍ മാത്രം ഈയാഴ്‍ച മരിച്ചത് ഏഴുപേരാണ്. മരിച്ചവരില്‍ ഒരു 28 വയസ്സുകാരനായ രക്ഷാപ്രവര്‍ത്തകനുമുണ്ട്. ന്യൂ സൗത്ത് വെയില്‍സില്‍ 381 വീടുകള്‍ പൂര്‍ണമായും കത്തിനശിച്ചു. വിക്റ്റോറിയയില്‍ 43 വീടുകളാണ് കത്തിച്ചാമ്പലായത്. എന്നാല്‍ തീ ഇപ്പോഴും പടരുന്നതിനാല്‍ ഈ സംഖ്യകള്‍ ഇനിയും ഉയരും. കാട്ടുതീ രൂക്ഷമായതിന് ശേഷം നിരവധിയാളുകളെ കാണാതായിട്ടുമുണ്ട്. വിക്റ്റോറിയയില്‍ 17 പേരെ കാണാതായതായി സംശയിക്കുന്നുണ്ടെന്നാണ് വിക്റ്റോറിയന്‍ പ്രീമിയര്‍ ഡാനിയല്‍ ആന്‍ഡ്രൂസ് പറഞ്ഞു.
മറ്റു സംസ്ഥാനങ്ങളിലും സ്ഥിതി ഗുരുതരം
ന്യൂ സൗത്ത് വെയില്‍സിലും വിക്റ്റോറിയയിലുമാണ് കാട്ടുതീ ഏറ്റവും രൂക്ഷമായതെങ്കിലും ഓസ്ട്രേലിയയിലെ മറ്റു സംസ്ഥാനങ്ങളിലും സ്ഥിതി രൂക്ഷമാണ്. വെസ്റ്റേണ്‍ ഓസ്ട്രേലിയയിലും സൗത്ത് ഓസ്ട്രേലിയയിലും വ്യാഴാഴ്‍ചയോടെ കാട്ടുതീ വ്യാപകമായിട്ടുണ്ട്. വെസ്റ്റേണ്‍ ഓസ്ട്രേലിയയില്‍ കാട്ടുതീയെ തുടര്‍ന്ന് 330 കിലോമീറ്ററോളം ദൂരം റോഡ് അടച്ചിരിക്കുകയാണ്. നിരവധി വാഹനങ്ങള്‍ കുടുങ്ങിക്കിടക്കുകയാണ്. മല്ലകൂട്ടയില്‍ ആയിരക്കണക്കിനാളുകളാണ് കാട്ടുതീ പടര്‍ന്നതിനെ തുടര്‍ന്ന് ബീച്ചുകളിലേക്ക് പലായനം ചെയ്‍തത്. ഇവരെ നാവികസേന ബോട്ടുകളില്‍ രക്ഷപ്പെടുത്തുമെന്നാണ് പ്രതീക്ഷിക്കുന്നത്.