പാലക്കാട്: വരുന്ന നിയമസഭാ തെരഞ്ഞെടുപ്പില് മുഖ്യമന്ത്രി പിണറായി വിജയന് വീണ്ടും മത്സരിക്കുമെന്ന് മുതിര്ന്ന സിപിഎം നേതാവ് എകെ ബാലന്. സിപിഎമ്മിലെ രണ്ട് ടേം വ്യവസ്ഥ അനിവാര്യ ഘട്ടങ്ങളില് മാറ്റും. വ്യവസ്ഥകള് ഇരുമ്പുലക്കയല്ലെന്നും പിണറായി മത്സരിക്കുന്നത് എല്ഡിഎഫിന് ഗുണം ചെയ്യുമെന്നും അടുത്ത തെരഞ്ഞെടുപ്പോടെ കോണ്ഗ്രസ് ഛിന്നഭിന്നമാകുമെന്നും എകെ ബാലന് മാധ്യമങ്ങളോട് പറഞ്ഞു.
തെരഞെടുപ്പ് പ്രചാരണത്തിന് നേതൃത്വം നല്കുന്നയാള് അടുത്ത മുഖ്യമന്ത്രിയാകും. ഫലം വരുമ്പോള് കോണ്ഗ്രസ് പൂര്ണമായി അബോര്ട്ട് ചെയ്യപ്പെടും. യുഡിഎഫിന്റെ 100ലധികം സീറ്റെന്ന മോഹം മലര് പൊടിക്കാരന്റെ സ്വപ്നമാണെന്നും എകെ ബാലന് പരിഹസിച്ചു.
വെള്ളാപ്പള്ളി നടേശന് ന്യൂനപക്ഷത്തെ അധിക്ഷേപിച്ചിട്ടില്ല. ലീഗിനെയാണ് വെളളാപ്പള്ളി വിമര്ശിക്കുന്നത്. അതില് എന്താണ് തെറ്റെന്നും എകെ ബാലന് ചോദിച്ചു. സിപിഐയും വെള്ളാപ്പള്ളി നടേശനുമായുള്ള തര്ക്കം അവരുടെ കാര്യമാണെന്നും എകെ ബാലന് പറഞ്ഞു.