താന് ആക്രമിക്കപ്പെട്ട കേസിന്റെ അന്വേഷണം അട്ടിമറിക്കാന് ശ്രമം നടക്കുന്നുവെന്ന് ചൂണ്ടിക്കാട്ടി അതിജീവിത ഹൈക്കോടതിയില് സമര്പ്പിച്ച ഹര്ജി പരിഗണിക്കുന്നതില് നിന്ന് ജഡ്ജി പിന്മാറി. ജസ്റ്റിസ് കൗസര് എടപ്പഗത്താണ് പിന്മാറിയത്. കേസ് നാളെ മറ്റൊരു ബെഞ്ച് പരിഗണിക്കും.
ബെഞ്ച് മാറ്റം ആവശ്യപ്പെട്ട് അതിജീവിത അപേക്ഷ നല്കിയിരുന്നുവെങ്കിലും ഹൈക്കോടതി തീരുമാനമെടുത്തിരുന്നില്ല. ഇന്ന് രാവിലെ കേസ് നമ്പര് വിളിച്ച ശേഷമാണ് കേസ് പരിഗണിക്കുന്നതില് നിന്ന് പിന്മാറുകയാണെന്ന് ജസ്റ്റിസ് കൗസര് എടപ്പഗത്ത് അറിയിച്ചത്.
ജഡ്ജി ഇന്ന് സ്വയം പിന്മാറിയില്ലെങ്കില് കേസില് വാദം കേള്ക്കുന്നതില് നിന്ന് പിന്മാറാന് അതിജീവിത ആവശ്യപ്പെടുമെന്ന് അഭിഭാഷകന് നേരത്തെ വ്യക്തമാക്കിയിരുന്നു. വിചാരണ കോടതിയില് കേസ് പരിഗണിച്ച ജഡ്ജിക്ക് ഈ ഹര്ജി പരിഗണിക്കാന് ആകില്ലെന്നാണ് അതിജീവിതയുടെ നിലപാട്.