വിസ്മയ കേസിന്റെ വിധി കേള്ക്കാന് അച്ഛന് ത്രിവിക്രമന് നായര് കോടതിയിലേക്ക് തിരിച്ചത് മകള്ക്ക് നല്കിയ വാഹനത്തില്. വാഹനത്തിന്റെ ഫ്രണ്ട് സീറ്റ് ഒഴിച്ചിട്ടിരിക്കുകയാണ്. വിസ്മയയുടെ ആത്മാവ് തനിക്കൊപ്പം ഈ വിധി കേള്ക്കാന് കോടതിയിലേക്ക് വരുന്നുണ്ടെന്ന വളരെ വൈകാരികമായ പ്രതികരണമാണ് ത്രിവിക്രമന് നായര് നടത്തിയത്. ഈ വാഹനം വാങ്ങാന് മകളുമൊത്താണ് പോയതെന്നും അവള് ഇപ്പോഴും തങ്ങളോടൊപ്പമുണ്ടെന്നും അദ്ദേഹം പറയുന്നു. ത്രിവിക്രമന് നായരും ഒരു ബന്ധുവുമാണ് കോടതിയിലേക്ക് പോകുന്നത്. ത്രിവിക്രമന് നായര് വാഹനം ഓടിക്കുമ്പോള് ബന്ധു പിന്സീറ്റിലാണിരിക്കുന്നത്.
വിസ്മയ കേസിലെ വിധി സമൂഹത്തിനുള്ള സന്ദേശമാകണമെന്ന് അച്ഛന് ത്രിവിക്രമന് നായരും അമ്മ സജിത വി നായരും പറഞ്ഞു. 4,87, 000 വോയ്സ് ക്ലിപ്പുകളാണ് കിരണിന്റെ ഫോണില് നിന്ന് സൈബര് സെല്ലിന് ലഭിച്ചത്. ഓട്ടോമറ്റിക്കായി കോളുകള് ഫോണില് റെക്കോര്ഡ് ചെയ്യപ്പെടുന്നുണ്ടെന്ന് അവന് അറിഞ്ഞില്ലായിരുന്നു. വോയ്സ് ക്ലിപ്പുകളനുസരിച്ച് ഇനിയും നിരവധി പ്രതികള് വരും. അവരെ സമൂഹത്തിന് മുന്നില് കൊണ്ടു വരാനാണ് ഇനിയുള്ള ശ്രമമെന്നും അച്ഛന് വ്യക്തമാക്കി.
കേസുമായി ഒരു ബന്ധവുമില്ലാത്ത ചോദ്യങ്ങളാണ് പ്രതിഭാഗം അഭിഭാഷകന് പ്രതാപചന്ദ്രന് കോടതിയില് വെച്ച് തങ്ങളോട് ചോദിച്ചത്. രണ്ട് പെണ്കുട്ടികളുടെ പിതാവാണ് അഭിഭാഷകന് പ്രതാപചന്ദ്രനും. അത് അദ്ദേഹം മറക്കരുത്. ഭാര്യ നഷ്ടമായ ഭര്ത്താവിന്റെ കേസാണ് താന് എടുത്തിരിക്കുന്നതെന്നാണ് അദ്ദേഹം പറയുന്നത്. ഞാന് ചെയ്തതിനുള്ള ശിക്ഷയാണ് ഇപ്പോള് അനുഭവിക്കുന്നതെന്നും പിതാവ് പറഞ്ഞു. പരമാവധി ശിക്ഷ പ്രതിക്ക് ലഭിക്കുമെന്നാണ് പ്രതീക്ഷയെന്ന് വിസ്മയയുടെ അമ്മ സജിത വി നായര് പ്രതികരിച്ചു.
നിലമേല് സ്വദേശിനി വിസ്മയ സ്ത്രീധന പീഡനത്തെ തുടര്ന്ന് ആത്മഹത്യ ചെയ്ത കേസില് കുറ്റക്കാരനെന്ന് തെളിഞ്ഞ ഭര്ത്താവ് കിരണ് കുമാറിനുള്ള ശിക്ഷ കോടതി ഇന്ന് രാവിലെ 11ന് വിധിക്കും. കേസില് കിരണ് കുറ്റക്കാരനാണെന്ന് ഇന്നലെ കോടതി വിധിച്ചിരുന്നു. ഏഴു വര്ഷം മുതല് ജീവപര്യന്തം തടവുശിക്ഷ വരെ ലഭിക്കാവുന്ന കുറ്റങ്ങള് കിരണ് ചെയ്തിട്ടുണ്ടെന്നാണ് കോടതി വിലയിരുത്തല്.
രാവിലെ പതിനൊന്നു മണിയോടെ കൊല്ലം അഡീഷണല് ജില്ലാ സെഷന്സ് കോടതിയില് ശിക്ഷയെ കുറിച്ചുളള വാദം തുടങ്ങും. ഉച്ചയോടെ കോടതി വിധി പ്രഖ്യാപിക്കാനാണ് സാധ്യത. കിരണിന് ജീവപര്യന്തം ശിക്ഷ നല്കണമെന്ന ആവശ്യമാകും പ്രോസിക്യൂഷന് ഉന്നയിക്കുക. പ്രായം പരിഗണിച്ച് ശിക്ഷയില് ഇളവു നല്കണമെന്നാകും പ്രതിഭാഗത്തിന്റെ വാദം.