പിറവം: കോട്ടയത്തെ ബോട്ട് വീടിനു പ്രായം 44 വയസ്സ്. കൗതുക കാഴ്ച്ചയായി പെരുവ-പിറവം റോഡരികിലാണ് ബോട്ട് വീട് സ്ഥിതി ചെയ്യുന്നത്. പെരുവയില്‍ നിന്ന് നാല് കിലോമീറ്റര്‍ ദൂരത്തില്‍ റോഡരികിലായിട്ടാണ് ഈ ബോട്ട് വീട് സ്ഥിതി ചെയ്യുന്നത്.
ആദ്യമായി കാണുന്നവര്‍ക്ക് യാത്ര ചെയ്യുന്നതിനായി ജെട്ടിയില്‍ നിര്‍ത്തിയിട്ടിരിക്കുന്ന ബോട്ടാണെന്ന് സംശയം തോന്നിപ്പിക്കും വിധമാണ് ഇതിന്‍റെ നിര്‍മാണം. 1976 ല് മുളക്കുളം സ്വദേശിയായ പോലീസ് കോണ്‍സ്റ്റബിള്‍ പി.ആര്‍. നാരായണന്‍ നായരാണ് ബോട്ട് വീട് നിര്‍മിച്ചത്.
ആദ്യകാലങ്ങളില്‍ ഈ വഴി യാത്ര ചെയ്തിരുന്നവര്‍ വാഹനങ്ങള്‍ നിര്‍ത്തി ബോട്ട് വീട് വ്യക്തമായി വീക്ഷിച്ച ശേഷമേ യാത്ര തുടര്‍ന്നിരുന്നുള്ളുവെന്ന് നാട്ടുകാര്‍ പറയുന്നു. കേരളത്തിലെ ആദ്യത്തെ ബോട്ട് വീടാണിതെന്നും പഴമക്കാര്‍ പറയുന്നു. ചേര്‍ത്തല പള്ളിപ്പുറം സ്വദേശിയായ ഭാര്യ സുമതിയമ്മയുടെ വീട്ടിലേക്കു ബോട്ടില്‍ യാത്ര ചെയ്യുന്നതിനിടെയാണ് നാരായണന്‍ നായരുടെ മനസില്‍ ബോട്ട് വീട് നിര്‍മിക്കണമെന്ന ആഗ്രഹം ഉണ്ടാകുന്നത്.
പിന്നീട് പുതിയ വീട് നിര്‍മിക്കുവാന്‍ തീരുമാനിച്ചപ്പോള്‍ മറ്റൊന്നും ആലോചിച്ചില്ല. പുതുമയ്‌ക്കൊപ്പം ചെലവ് കുറയുകയും വേണമെന്ന് ഉറപ്പിച്ചപ്പോള്‍ വീടിന്‍റെ രൂപം ബോട്ടിന്‍റേത് ആക്കാന്‍ ഉറപ്പിച്ചു. സ്വന്തമായുണ്ടായിരുന്ന ഏഴ് സെന്‍റ് ഭൂമിയില്‍ രണ്ട് സെന്‍റില്‍ ബോട്ട് വീടിന്‍റെ നിര്‍മാണമാരംഭിച്ചു.
മുന്‍വശത്ത് വിസിറ്റിംഗ് റൂം, പിന്നിലായി രണ്ട് കിടപ്പ് മുറികള്‍ ഉള്‍പ്പെടെ നാല് റൂമുകളാണ് വീടിനുണ്ടായിരുന്നത്. ഓരോ റൂമിനും 10 അടി നീളവും ഒമ്പത് അടി വീതിയും 9.5 അടി ഉയരവുമായിരുന്ന് ഉണ്ടായിരുന്നത്. ബോട്ടിന്‍റെ നീളം 16.5 കോലും കിടപ്പ് മുറിയുടെ പുറകിലായിരുന്നു അടുക്കള. അടുക്കളയുടെ പിന്നില്‍ ലാട്രിന്‍.
ബോട്ടിന്‍റെ രണ്ട് വശങ്ങളിലായി പതിനാറ് പാളികളുള്ള എട്ട് ജനലുകളും സ്ഥാപിച്ചിരുന്നു. ഓരോ മുറിയിലും ബോട്ടിലെ ലഗേജ് പോലുള്ള സൗകര്യവും ഒരുക്കി. പള്ളിപ്പുറം പാച്ചു ആചാരിയാണ് ബോട്ട് ഹൗസ് നിര്‍മിച്ചത്.
780 വെട്ടുകല്ലുകളും 5,500 ഇഷ്ടികകളും 18 ചാക്ക് സിമന്‍റും 150 പാട്ട കുമ്മായവും എട്ട് അടിയുടെ 24 ഷീറ്റുകളും ഉപയോഗിച്ചായിരുന്നു നിര്‍മാണം. പരേതനായ തന്‍റെ പിതാവ് രാമന്‍ നായരുടെ ഓര്‍മയ്ക്കായിട്ടായിരുന്നു നാരായണന്‍ നായര്‍ ബോട്ട് വീട് പൂര്‍ത്തിയാക്കിയത്.
തന്‍റെ പിതാവിന്‍റെ ഓര്‍മ നിലനിര്‍ത്തുന്നതിനായി പടിഞ്ഞാറോട്ട് യാത്രയ്ക്കു പുറപ്പെടാന്‍ തയാറായി നില്‍ക്കുന്ന ബോട്ട് വീട് വർഷങ്ങളായി രാജശേഖരന്‍ നായര്‍ സംരക്ഷിച്ചു വരികയാണ്.
