അഞ്ച് സംസ്ഥാനങ്ങളിലേക്കുള്ള ജനവിധി പുറത്തു വരുമ്പോള് ഏറ്റവും വലിയ രാഷ്ട്രീയ നേട്ടം ബിജെപിക്ക്. തെരഞ്ഞെടുപ്പ് നടന്ന അഞ്ച് സംസ്ഥാനങ്ങളില് നാലിടത്തും ബിജെപി മികച്ച പ്രകടനമാണ് കാഴ്ച വച്ചത്. ഉത്തര് പ്രദേശ്, ഉത്തരാഖണ്ഡ്, മണിപ്പൂര്, ഗോവ എന്നീ സംസ്ഥാനങ്ങളിലാണ് ബിജെപി മുന്നിലുള്ളത്. പഞ്ചാബില് ആം ആദ്മി പാര്ട്ടിയാണ് വിജയിച്ചത്.
ഉത്തര്പ്രദേശിലും ഉത്തരാഖണ്ഡിലും ബിജെപി ഭരണത്തുടര്ച്ചയിലേക്ക്. യുപിയില് 275ല് അധികം സീറ്റുകളില് ബിജെപി സ്ഥാനാര്ഥികള്ക്ക് ലീഡുണ്ട്. സമാജ്വാദി പാര്ട്ടി 119 സീറ്റില് മുന്നേറുന്നു. ഗോവയിലും മണിപ്പൂരിലും ബിജെപി ഭരണമുറപ്പിച്ചു.
പഞ്ചാബില് കോണ്ഗ്രസിനെ ആം ആദ്മി പാര്ട്ടി നിലംപരിശാക്കി. 117 സീറ്റില് 90 ലും ലീഡ്, വിപ്ലവകരമായ ഫലമെന്ന് കേജ്രിവാള് പറഞ്ഞു. ഗോവയിലും ആംആദ്മി അക്കൗണ്ട് തുറന്നു. ബെനോലിമ്മില് വെന്സി വേഗാസും വേളിമില് ക്രസ് സില്വയും ജയിച്ചു. അതേസമയം, ഗോവയില് ബിജെപി ഗവര്ണറെ കാണും. ഗോവയില് 19 സീറ്റില് ബിജെപി ലീഡ് നേടി. സര്ക്കാര് രൂപീകരിക്കാന് ഗവര്ണറെ ഇന്നുതന്നെ കാണാനാണ് നീക്കം.
കോണ്ഗ്രസിന്റെ പരമ്പരാഗത കേന്ദ്രങ്ങളിലെല്ലാം ബിജെപിയുടെ തേരോട്ടമാണ് നടന്നത്. നെഹ്രു കുടുംബത്തിന്റെ തട്ടകമായിരുന്ന റായ്ബലേറിയില് കോണ്ഗ്രസ് തകര്ന്നടിഞ്ഞു. റായ്ബറേലിയില് ബിജെപി സ്ഥാനാര്ത്ഥി അദിതി സിംഗാണ് മുന്നിട്ട് നില്ക്കുന്നത്. കോണ്ഗ്രസിന്റെ മനീഷ് ചൗഹാന് മണ്ഡലത്തില് പിന്നിലാണ്.
1952 മുതല് കോണ്ഗ്രസിനെ തുണച്ച റായ്ബറേലി മണ്ഡലം 1996-1998 ല് മാത്രമാണ് ബിജെപിയെ തുണച്ചത്. അന്ന് അശോക് സിംഗാണ് റായ്ബറേലിയില് നിന്ന് വിജയിച്ചത്. എന്നാല് 2022ല് വീണ്ടും ബിജെപിയെ തുണയ്ക്കുന്ന കാഴ്ചയാണ് റായ്ബറേലി മണ്ഡലത്തില് കാണുന്നത്. കോണ്ഗ്രസ് നേതാവായിരുന്ന അഖിലേഷ് സിംഗിന്റെ മകളാണ് റായ്ബറേലിയില് ബിജെപി സ്ഥാനാര്ത്ഥിയായ അദിതി സിംഗ്. 2007 ലും 2012 ലും കോണ്ഗ്രസ് ടിക്കറ്റില് റായ്ബറേലിയില് നിന്ന് മത്സരിച്ച് ജയിച്ച വ്യക്തിയാണ് അഖിലേഷ് സിംഗ്.
2017 ല് കോണ്ഗ്രസ് സ്ഥാനാര്ത്ഥിയായിരുന്ന അദിതി സിംഗ് 1,28,319 വോട്ടുകള്ക്കാണ് അന്ന് റായ്ബറേലിയില് നിന്ന് വിജയിച്ചത്. തൊട്ടടുട്ട തെരഞ്ഞെടുപ്പില് എതിര്പാര്ട്ടിക്ക് വേണ്ടി അതേ മണ്ഡലത്തില് നിന്ന് തന്നെയാണ് അദിതി സിംഗ് ജനവിധി തേടുന്നത്. 2021 നവംബര് 25നാണ് അദിതി ബിജെപിയില് ചേരുന്നത്.
കര്ഷക സമരങ്ങള്ക്ക് ചുക്കാന് പിടിച്ച മണ്ഡലങ്ങളിലും ബിജെപിക്ക് കാലിടറിയില്ല എന്നത് അമ്പരപ്പിക്കുന്നതാണ്.