സോളാര് അപകീര്ത്തി കേസില് വിഎസ് അച്യുതാനന്ദന് എതിരെയുള്ള സബ് കോടതി ഉത്തരവിന് സ്റ്റേ. സോളാര് മാനനഷ്ട കേസില് ഉമ്മന് ചാണ്ടിക്ക് വിഎസ് അച്യുതാനന്ദന് പത്ത് ലക്ഷം രൂപ നല്കണമെന്ന സബ് കോടതി ഉത്തരവാണ് തിരുവനന്തപുരം ജില്ലാ കോടതി സ്റ്റേ ചെയ്തത്. വിഎസ് അച്യുതാനന്ദന് നല്കിയ ഹര്ജിയിലാണ് നടപടി. കേസ് 23 ന് കോടതി വിശദമായി പരിഗണിക്കും.
സോളാര് കേസ് കത്തി നിന്ന 2013 ലാണ് കേസിനാസ്പദമായ സംഭവം നടന്നത്. അന്ന് ഒരു മാധ്യമത്തിന് പ്രതിപക്ഷ നേതാവായിരുന്ന വിഎസ് നല്കിയ അഭിമുഖത്തിലായിരുന്നു മുഖ്യമന്ത്രിയായിരുന്ന ഉമ്മന് ചാണ്ടിക്കെതിരെ ആരോപണം ഉന്നയിച്ചത്. ഉമ്മന് ചാണ്ടിയുടെ നേതൃത്വത്തില് ഒരു കമ്പനിയുണ്ടാക്കി തട്ടിപ്പ് നടത്തിയെന്നായിരുന്നു ആരോപണം.
2014 ലാണ് ഉമ്മന് ചാണ്ടി അപകീര്ത്തി കേസ് ഫയല് ചെയ്തത്. പ്രസ്താവന പിന്വലിക്കണമെന്ന് ആവശ്യപ്പെട്ട് ഉമ്മന് ചാണ്ടി സമര്പ്പിച്ച വക്കീല് നോട്ടീസില് ഒരു കോടി രൂപയായിരുന്നു ആവശ്യപ്പെട്ടത്. കേസ് കോടതിയില് ഫയല് ചെയ്തപ്പോള് 10,10,000 രൂപയാണ് നഷ്ടപരിഹാരമായി ആവശ്യപ്പെട്ടത്.
നഷ്ടപരിഹാരത്തിന് പുറമെ ഇതുവരെയുള്ള ആറ് ശതമാനം പലിശയും വിഎസ് അച്യുതാനന്ദന്, ഉമ്മന് ചാണ്ടിക്ക് നല്കണം. പക്ഷെ നിയമ പോരാട്ടം തുടരാനാണ് തീരുമാനമെന്ന് വിഎസിന്റെ അഭിഭാഷകന് അറിയിച്ചു. കേസില് സബ് കോടതി വിധിക്കെതിരെ ജില്ലാ കോടതിയില് അപ്പീല് സമര്പ്പിക്കുമെന്നാണ് അദ്ദേഹം അന്ന് വ്യക്തമാക്കിയിരുന്നു.