നടി അര്ച്ചന കവിയുടെ ആരോപണത്തില് എസ്.എച്ച്.ഒയ്ക്കെതിരെ നടപടി. ഫോര്ട്ട് കൊച്ചി എസ്.എച്ച്.ഒ സി.എസ് ബിജുവിനെ സിറ്റി പൊലീസ് കമ്മീഷണര് താക്കീത് ചെയ്തു. ആഭ്യന്തര അന്വേഷണത്തില് എസ്.എച്ച്.ഒയുടെ ഭാഗത്ത് തെറ്റ് സംഭവിച്ചെന്ന് കണ്ടെത്തിയിരുന്നു. കൊച്ചിയില് വാഹന പരിശോധനക്കിടെ പൊലീസ് നടത്തിയത് സദാചാര പൊലീസിംഗെന്ന് നേരത്തെ നടി അര്ച്ചന കവി ആരോപിച്ചിരുന്നു.
രാത്രി യാത്രയ്ക്കിടെ കൊച്ചി പൊലീസില് നിന്ന് ഉണ്ടായ ദുരനുഭവം പങ്കുവച്ചെങ്കിലും നടി അര്ച്ച കവി സംഭവത്തില് പരാതി നല്കിയിരുന്നില്ല. ഈ സാഹചര്യത്തിലാണ് നടപടി താക്കീതില് ഒതുങ്ങിയത്. ഇക്കഴിഞ്ഞ ഞായറാഴ്ച രാത്രിയില് സ്ത്രീകള് മാത്രം യാത്ര ചെയ്ത ഓട്ടോ തടഞ്ഞ് കൊച്ചി പൊലീസ് മോശമായി പെരുമാറിയെന്നാണ് ഇന്സ്റ്റഗ്രാമില് പങ്കുവച്ച കുറിപ്പില് നടി വ്യക്തമാക്കിയത്. കൊച്ചി രവിപുരത്ത് നിന്ന് ഓട്ടോയില് സുഹൃത്തിനും കുടുംബത്തിനുമൊപ്പം ഫോര്ട്ട് കൊച്ചിയിലേക്ക് യാത്ര ചെയ്യുന്നതിനിടെയാണ് സംഭവം.
ഓട്ടോ തടഞ്ഞ് നിര്ത്തിയ പൊലീസ് രൂക്ഷമായ ഭാഷയിലാണ് വിവരങ്ങള് ചോദിച്ചതെന്നും മുഴുവന് കാര്യങ്ങള് പറഞ്ഞിട്ടും പിന്തുടര്ന്നെന്നുമാണ് പോസ്റ്റില് നടി ആരോപിച്ചത്. പരാതിയുമായി മുന്നോട്ട് പോകാന് താത്പര്യമില്ലെന്നും തന്റെ അനുഭവം മറ്റുള്ളവര് കൂടി അറിയാനാണ് സമൂഹ മാധ്യമത്തില് കുറിപ്പ് പങ്കുവച്ചതെന്നും നടി പ്രതികരിച്ചിരുന്നു.